En maor praoten...
En maor praoten...
Janmac-blog
woensdag 14 juni 2018
Ze hebt mien as klein keerltjen al vrog leren praoten en dat lukken toen merakels goed. Messchien wel ’n betjen té goed, want ik kreg d’r alderbastend völ aregheid an. Dat succes wed mien niet altied in dank afgenommen. Mien vader zei wel ’s: “wod i-j maor onderwiezer,” maor dukker heuren ik: “den lult in ’n uur ’n hond dood.” As kleinen krömmel kreg ik al de naam ‘n old waswief te zun. Ok wier d’r wel ’s gezegd: “hol toch ‘n hötjen de kwakerd.” “As Lulleman dood geet, mot i-j maor gaon solliciteren” klink mien ok bekend in de oren. De letste tied bun’k dan ok de overlijdensadvetenties in de krant steeds dukker an’t naokieken, want ik heb now al ach joor gin baantje meer. Jammergenog bun’k de rouwadvetentie van Lulleman nooit tegengekommen, want den zien werk liek mien wel wat. Ik heb drieënveerteg joor veur de klas gestaon, maor heb nog steeds haeveg schik met praoten. Stel ow veur da’j betaald krieg veur de hele dag deur praoten. Ik wet dat d’r zat luj zun die door de kos met vedient, maor den baan van Lulleman is toch wel ’t hoogste wa’j kunt bereiken. Präötjes vezinnen doe’k wieters af en toe op mien blog en a’k d’r zin in heb, geet mien dat ok wel adeg goed af.
Afgelopen zaoterdag mos ik effen ’n nachje worren opgenommen in ’t ziekenhuus vanwaege mien hatslag. Den was völs te hoog en dus leien ze mien ’n nachjen an de monitor. D’r wieren allemaol dräödjes op mien boek geplek en op ’t scherm ko’j dan zien hoe ’t d’r bi-jston. Door mos i-j dan wel veur deurgeleerd hemmen en dat he’k jammergenog niet. Ok was d’r ’n vepleegster die mien bloed kwam afnemmen. Zelfs midden in de nach, zo rond ’n uur of drie. Gelukkeg was die juffrouw ok niet vies van ’n präötjen en ze vetellen mien dat ze zelfs nog an’t bi-jleren was. Eers had ze biowetenschappen en zoiets met scheikunde gestudeerd en met den opleiding moch ze dus gaetjes in mensen prikken. Maor now was ze ok nog bezeg met de aovend-Pabo. De prikzuster gaf saxefoonles en ik begrep dat ze doorbi-j ondek had dat lesgeven hatstikke mooi werk is. De raekentoets had ze al met succes achter de rug en da’s natuurlek mooi, maor niks bezunders a’j al zo’n ingewikkelde studie gedaon heb. Plat praoten kon ze ok ’n klein betjen, want toen ze weggong, zei ze: “goedgaon.” Geleuf maor dat de blagen die zon juffrouw kriegen d’r hatstikke bli-j met zöllen waezen.
Zelfs toen’k sliep hielen ze mien op ‘n afstandjen in de gaten, maor de volgende margen kwam de hatspecialis en den sturen mien um tien uur weer naor huus. Ik wier dus ontslagen. De meeste mensen bunt door ga niet bli-j met, maor ik miek da’k wegkwam veur hi-j zich zol bedenken. Niet veur niks numen ze zo iemand ‘cardioloog’ en ik was bang dat e weer gelaogen kon hemmen. Ik slaop ok liever in mien eigen bed en door bun’k thuus ok geliek met wieter gegaon. Jao, want behalve van völ praoten hol ik ok van lang slaopen. Toen’k eindelek wakker wier, zei ik tegen mien vrouw da’k binneköt toch maor weer ’s gong solleciteren veur ‘Lulleman.’ Zi-j menen echter mien alle haop te motten wegnemmen deur te veklaoren da’k doorveur ga gin kans zol maken. “En weurum dan niet?” vroeg ik. “I-j praot völs en völs te völ,” was heur antwoord en door kon’k ’t met doen.
’t Liefs praot ik namelek as mien vrouw an’t tillevisiekieken is. Zelf hol ik door helemaol niet van, van tillevisiekieken bedoel ik, en as ik toevalleg binnen zit en niet in mien atelier, wat meestal wel ’t geval is, en mien vrouw kik tillevisie, dan he’k d’r eiges aregheid an um zowat elk programma van commetaar te veurzien. Meestal geet dat dan aover iets wat volges mien niet klopt en dus geet ’t heeltied aover zowat alles wa’j ow maor kun indenken. Schoolmeesters menen namelek dat ze altied alles baeter wetten. Dat wet iedereen.
Foto van vrogger. Met mien vader,
toen’k nog ‘n zuut kaerltjen was.
De meeste problemen he’k – en dat klink bes wel gek veur iemand die zo völ van praoten hölt – met praotprogramma’s. Soms wod ik door zo maeleg van da’k veur mien computer gao zitten um de ammekaarpraoter van zon programma allerlei gekkegheid in de mond te leggen. ’n Flinken hot geleien he’k dat gedaon met Jeroen Pauw. Ik bedoel den keerl den altied met de ogen zit te knipperen of e niet helemaol goed wies is. Hi-j trad toen nog op samen met Witteman, den ik trouwes wel mag li-jen. Door he’k toen ‘n fotostrip van gemaak. Is al weer van ’n hötjen trug, maor ’t is now eenmaol zo dat völpraoters vaak in herhaling vallen en door bun ik gin uutzondering op.
Ok helemaol niks he’k met iemand den de letste tied geleuf ik niet meer te zien is, maor ik kan mien vegissen, en da’s Knevel. Ik denk da’k niet de enegsten bun den door kats misselek van wödt.
A’j now ni-jsgiereg gewodden bun, klik dan maor’s op ‘n plaatje hiernaos: