zondag 1 juli 2018

Wanneer i-j bi-jnao ow hele laeven op nog gin tien kilometer afstand van ‘n indrukwekkend en fraai kasteel heb gewoond, is ‘t natuurlek ‘n butenkansje um ‘t, gewoonlek niet veur publiek toegankeleke gebied derumhen, ‘s te meugen betraejen. As kind was ik wel ‘s stiekem in ‘t ‘vebaojen bos’ gewaes, dat onderdeel uutmik van ‘t landgoed. Aan de Sillevoldse kant van ‘t terrein lag töt ‘t end van WOII namelek ook ‘n kasteel, Schulenburg en as ongeveer tienjorege klom ik ‘s aover ‘t hek van de plek den, zoals de naam dervan al aangif, ok nog ’s vebaojen grond was, um der binnen tien minuten deur de boswachter te wodden afgeknikkerd.


Hemelsbreed minder as viefteg meter van disse jeugdzonde af, he’k mien later veerteg joor kostelek wetten te vemaken op ‘n school.

Ik kan mien indenken dat mien leerlingen ok af en toe hun ni-jsgierigheid niet hemmen können bedwingen en ok ‘t grimmig met artikel 461 schermende bod links of baeter, vanwaege de brandnettels, rechs hemmen laoten liggen.


Maor now moch ‘t. Alleen in de tuin, maor ok leuk. Met de ‘fluuster’boot De Iesselganger wedden wi-j vanuut ‘t DRU Industriepark naor de anlegsteiger in Teborg gebrach. ‘t Initiatief veur disse prachtige trip ging uut van Aggie Daniëls die haeveg druk is met ‘t schrieven van ‘n boek aover de historie van ‘t kasteel. Uuteraard wet zi-j der zo goed as alles van te vetellen. Aggie begon eur vehaal al onder ‘t varen en ok in de kasteeltuin wis zi-j ‘t gezelschap te boeien met allerli-j anekdotes die in eur boek ongetwiefeld een uutgebreid vervolg zöllen kriegen.


‘t Kasteel is, net as ‘t d’rumhen liggende landgoed eigedom van de familie Vegelin van Claerbergen en, zoas gezeg, normaal niet toegankelek veur publiek. De hele tocht inclusief bezichteging van de tuinen rondum ‘t gebouw nam ongeveer tweeëneenhalf uur in beslag terwijl ik mien vermiek met ‘t in fotografische prenten en filmbeelden vasleggen van deze happening, waarveur ik via e-mail ‘n uutneudeging had gekregen.


Op de boot wazzen de ramen naor baoven losgeklap en ondanks de langzaam toenemmende warmte buten was ‘t hierdeur an boord lekker uut te hollen. ‘t Begrip fluusterboot slöt helaas alleen maor op ‘t bootje zelf, want sommige passagiers mosten soms töt kalmte wodden gemaand umdat ze meka, gezien  hun eigen geanimeerd geklets, lange tied niet meer hadden gezien. De vestaonboorheid van onze gids wed der doordeur niet gemakkeleker op.


In Terborg gingen wi-j vlak veur de ophaalbrug van boord en ’t hele gezelschap schufelen langzaam richting centrum. Veur de enige winkelstraot die het stadje riek is, wed rechsaf geslagen bi-j ‘t monumentale pand Deurvorst dat now prachtig gerestaureerd wödt. Dat het zolang ik mien kan herinneren in verpauperde staat verkeerd en now een verrassende metamorfose ondergaon.


Wi-j kreggen een kötte uutleg aover ‘t smeedwerk van ‘t toegangshek. Via een ziedhekje konnen wi-j ongehinderd passeren um geliek ‘t indrukwekkende veuraanzich van Huus Wisch in al zien glorie op ons te laoten inwerken. ‘t Pad dat wi-j vevolges insloegen, was dudelek gemarkeerd as strik verbaojen, maor onze gedispenseerde gids ging ons veur en iedereen volgen, op weg naor alle schoons op natuurgebied dat normaal vri-jwel geheel onbereikboor is veur ‘t klootjesvolk. De beum op ‘t terrein zun af en toe van indrukwekkende afmaetingen. Onze akela wis te vetellen dat onlangs de ‘geboorteboom’ van de huidege eigenaar geveld was deur ‘n storm. De jonkheer wees der eur lakoniek op dat ‘t toch wel heel biezunder genuumd mag wodden dat iemand de boom den speciaal veur ‘m geplant is, wet te overlaeven.


Umda’k mien veurnamelek concentreren op mooie beelden met ‘t plannetje um door bi-jgevoegd filmpje van te maken, kreg ik niet alle informatie met, maor dat is gin probleem umdat ‘t te veschienen boek disse leemte ongetwiefeld geet opvullen. Nog een paar maond wachten en iedere geïnteresseerde kan der dan van genieten. Op 18 augustus is der weer een trip en vanwaege ‘t unieke karakter dervan is ‘t slim disse daotum maor vas in ow agenda op te schrieven of, nog baeter, snel te reserveren op www.ijsselvaart.nl

Veur de pries van € 15,- per persoon, exclusief boekingskosten van € 1,- ma’j dit beslis niet missen.


In de boot wedden wi-j nog getrakteerd op thee of koffie met een ‘oerbreudje’
da’k mien goed liet smaken. Toen’k nao afloop van de schone tocht op mien fiets opaan liep, ha’k nog ‘n geanimeerd gesprek met ‘n echtpaar dat as kersverse Achterhoekers pas köt geleien in disse streek is kommen wonen. Hun zoon bleek hetzelfde beroep uut te oefenen as woormet ik mien veertig joor onledig heb gehollen. Bofkont dus. Zi-jzelf aoverigens ok, want woor kö’j now mooier wonen dan in onze Achterhoek. Alleen dialect spreken, dat gaat nog niet zo heel erg goed. Veel gaan oefenen en dan komt dan vanzelf ook voor elkaar.
 

WALD-spelling: Joop Keurentjes

Deze blog is ook in het Nederlands beschikbaar. Klik hiervoor hieronder op ‘vorige’.