Weer wat moois in Sillevold: now wilt ze den hele kabelbaan weer afbraeken. De luj die zo’n kold ritjen hemmen gemaak, bunt d’r achter dat zon kabelbaan van Langerak naor Zillevold eigelek helemaol niks is en ze zit d’r haeveg met in de maag. Nao de gebeurtenis van zondag twee waek geleien, waogen d’r niemand meer in dat ding te kroepen. Die keerls die de päöl gezet hemmen, könt ok niet eengaal in de buurt blieven um mensen uut zo’n coupeetje te halen as ’t effen niet uutkump. ’t Was ok gin gezich zo hoog. Geveurlek, kold én die vrouwluj maor schreeuwen.

’t Endstation, za’k maor zeggen, heb ze al helemaol an de grond liggen.

Maor now zit ze in Zillevold dus met die päöl. Jao wat mo’j door in hemelsnaam now met?

’n Allejekesen hoop päöl met zo’n draod dertussen. Wat he’j door now nog an. Afbraeken wier veurgesteld, maor dat kos heupen geld en natuurlek motten ze dan de Europese subsidie trugbetalen.

In Ulf hemmen ze zich natuurlek hatstikke kapot gelachen aover den Zillevoldse kabelbaan. Maor zelf hadden ze ok ’n paar päöl neergezet woor ze now helemaol wiejers niks an hebt. Iemand stellen veur um d’r lampen in te maken veur at d’r weer zo’n muziekfestival is. Dan he’j nog wat. Die twee päöl staot toevalleg precies op de goeie plek. Van die andere päöl kunt ze ok nog wegwiezers maken um an te wiezen waor dat festivalterrein is. Ze könt ze ok deurtrekken töt de grens, met wegwiezers derop veur Turkse ministers zodat die de weg naor Duitsland makkelekker können vinnen. Wazzen zo maor wat actuele veurstellen.

In Zillevold bunt ze bezig met ’t uutschrieven van ’n wedstried veur ’t beste idee. I-j mot d’r ok ga niet an denken dat zukke dingen bi-j ow in de buurt staon en da’j d’r niks met kunt as alleneg tegenan kieken. In Etten wollen ze d’r al windmolens van maken. Jammergenog staot d’r steeds twee naos mekaar en dan zol d’r toch nog ene van weg motten. Anders nimp de ene de wind weg van den andere.

De Zillevoldse commissie probeert nog ’n betjen heur gezichsverlies te veurkommen deur den wedstried en ok door wilt ze weer ’n hoop geld tegenan gooien. Dus as iemand ’n idee het, wa’j met meer dan vieftig van die päöl kun doen, mot ze zich maor effen melden. Wim Veenhuzen wol wel ’n mud eerpels beschikbaor stellen en ’n andere Zillevoldse middestan-der baod viefteg liter bezine an. Niet um zo’n ding an te staeken maor as beloning veur ’t idee. Dus veur de auto. Ik zeg ’t d’r maor effen bi-j zodat ze mien niet van opstökeri-j of van terrorisme beschuldig.

Die coupeetjes bunt makkeleker an de man te brengen. ’n Cafeholder in de Slangenburg bi-j Dörkum het d’r vas een angeschaf. Bi-j Taverne Edelweiss kö’j buten zitten en a’j ’t kold krieg, kö’j buten blieven en in zo’n ding kroepen. Door waejt ’t niet zo had. In den taverne kö’j ok nog aeten en da’s altied baeter dan hoog in de luch bi-j Zillevold hangen. Kermisexploitanten hemmen zich ok al gemeld. ’n Paar van die cabines heb ze al umgebouwd as gokkast en ’n ander het d’r ’n paar gekoch veur zin draejmöl. De meeste hökskes bun naor ’n bouwer van ’n reuzerad gegaon. Nee die cabines wazzen gin probleem. Ik heuren dat ze die zo’n betjen allemaol al kwiet bun.

Ze hemmen now ok haos met de päöl, want ’n paar waoghalzen hadden de aregheid um d’r met ’n soort parachuutje vanaf te springen. Now wilt ze d’r gauw vanaf veurdat ’t ongelukken gif. Dus as iemand nog ’n goed idee het veur ’t liefs zo völ meugelek päöl, dan mot e zich in Zillevold melden.