Janmac-blog
Terwijl ze in Zillevold dachten dat ’t nog wel een paar maond zol duren veur ze de ni-je kabelbaan in gebruuk zollen nemmen, wazzen der in ’t afgelopen weekend ’n paar middestanders die de attractie van de eeuw vas effen wollen uutbroberen. Now dat hebt ze gewetten! De waoghalzen hebt ’n paar uur in de kou gehangen hoog baoven ’t dörp en dat ritjen zölt ze niet gauw vergaeten.
Wat was ’t geval? De met Europese subsidie gebouwde kabelbaan den as doel het ons mooie dörp op de Achterhoekse kaat te zetten, is volges plan met de Zillevoldse Zommermark helemaol kloor. ’t Het heupen geld gekos, maor dan he’j ok wat. Binneköt könt de toeristen vanuut Langerak helemaol töt Zillevold hoog baoven in de luch genieten van ’t ommundeg mooie landschap. Veural van dat letste stuksken, baoven Zillevold. Dat mot alderbastend völ luj noor de schone Achter-hoek trekken. De plaatseleke middestand wrif zich zo hard in de handen dat ’t gläöjt. Nog ’n paar maond wachten en dan is de trekpleister helemaol in bedrief. Ze praot d’r in heel Nederland aover en da’s goed ni-js veur de Achterhoekse knip. Völ luj uut ’t westen komp hierher en da’s niet veur niks. Bi-j ons gif ’t de langste kabelbaan van Europa en geleuf maor dat dén völ bekieks zal kriegen.
Maor wat was dat afgelopen weekend now allemaol veur ’n elend? ’n Paar luj uut Sillevold dachten dat zi-j as eerste wel ’n ritje verdiend hadden umdat zi-j op ’t idee wazzen gekommen um subsidie an te vraogen. Joren geleien toen Zillevold nog alleneg bi-j Teborg heuren en met Vasseveld de gemeente Wisch vormen, had iemand ’t plannetje bedach um ’n betje Europees geld naar de Achterhoek te laoten streumen met ’t succesnummer da’j now van wiedaf hoog in de luch könt bekieken. ’t Idee was da’j dan ok van baoven naor onderen kunt kieken en wel naor al dat moois dat ’t bi-j ons gif, zo as Gerritsen’s möl, koeien en de peerdjes bi-j Hetterscheidt in de wei, de twee Zillevoldse kerktorens, ‘t Creatieplein, de Harbershoek, ‘t Isala College en wat ’t allemaol nog meer veur moois gif in Zillevold.
Now wieren ze door in Ulf helemaol niet bli-j van. Door mieken ze de blits met de ni-je DRU en niet te vergaeten den elektrische boot woor i-j met op de Iesselt kunt varen van Ulf naor zowat in Dörkum. Deurdat now Zillevold en Ulf ene gemeente zun, liepen de gemoederen af en toe hoog op. Ulf lag dwas en vulen zich zwoor bedretten. Woor ze in Ulf ’t mees kwaod aover wazzen, was dat ’t kabelbaantjen in Zillevold ophiel. Uut veurzörg hadden ze in Ulf vas twee extra päöl neergezet, maor door zit ga gin kabel tussen. Net a’j Zillevold uutgaot, hölt ‘t succesnummer op. Gaf allemaol ’n allerbastende hoop gekonkel in en buten de gemeenteraod, maor ’t plan was al joren geleien kloor en gin mens die d’r over dach um ’t baantje nog ’n endje wiejer te laoten gaon. Weurum ok? Hadden die luj uut Ulf maor uut de döppes motten kieken en eerder an de bel trekken.
Afgelopen weekend wier d’r dus proefgeraejen, of liever proefgevlaogen vanuut Langerak helemaol noor Sillevold. Alles gong goed töt an ’t endpunt. Door hadden ’n paar van die gannevers (uut Ulf?) der veur gezörg dat de kabels noor ’t huusken woor i’j mossen uutstappen, weggehaald wazzen. ’t Huusken zelf hadden ze ok deels vernield. De pannen wazzen bi-jnao allemaol van ’t dak gestaolen en wet ik allemaol wat nog meer. ’t Was zo’n grote bende dat der ’n hek umhen was gezet.
Kabelbaan
maandag 6 maart 2017
Trammelant op hoog niveau! Ze wollen de eersten zun en dat hebt ze gewetten.
De luj die hoog baoven in de luch hingen, konnen niet meer veur- of achteruut en ’t wier nog ommudeg kold ok. Wim Veenhuzen woont vlakbi-j de plek des onheils, zoas ze dat zo mooi nuumt, en den kreg medeli-jen met de waoghalzen die as eersten onze baan wollen uutproberen. Hi-j stak ’n vuurken an zodat ze ’t in ieder geval doorbaoven ’n betje warmer zollen kriegen, maor dat wier ‘m niet in dank afgenommen. ’n Paar luj begonnen heavig te blökken en een van de passagiers proberen van baovenaf ’t vuurken uut te miegen. Dat was gin gezich en d’r wazzen ok nog kinder bi-j die door naor stonnen te kieken. ‘He’j ’t of krie’j ’t?’ en ‘schaamt ow!’ riep Wim naor baoven.
Op ’t lets kwam de brandweer van Dörkum derbi-j umdat de päöl en dén draod veur de brandweer van de gemeente Olde Iessel te hoog wazzen. Maor ok die kwammen nog niet halverwaege. Gelukkeg was iemand zo snugger um de firma te bellen die de ommundig grote päöl had neergezet. Umdat ‘t zondag was, duren ‘t nog wel ‘n hötjen veur die op kwammen dagen en geleuf maor dat de luchreizigers ‘t goed kold hadden doorbaoven.
Op dizze foto zie’j de stoere keerls met hun helm op de kop naor baoven gaon. Ze hadden de handen vol an ‘t vrouwvolk dat as eerste uut moch stappen. ‘I-j blief mien van de boks’ waogen d’r nog één ondankboor te schreeuwen noor de redders in hoge nood. Maor dat kwam denk ik deur de zenuwen.
Ondertussen liet de politie wetten dat ze al ’n paar verdachten op ’t oog hadden. ‘Die komp zeker uut Ulf of Oer’ riep d’r ene uut ’t publiek. ‘Of Gendringen’ menen iemand te motten opmerken. In ieder geval niet uut Etten, want die bunt maor wat bli-j met die mooie päöl bi-j hun an de rand van ’t dörp. Stong lets nog ’n stuksken aover in de krant. Windmolens wollen ze der door ok nog graag bi-j hemmen.
Op de foto is goed te zien dat ze ongenadeg hebt huusgehollen op ‘t kabelbaanhuusken. Rechts de päöl die ganiet neudig bunt, maor die ‘n paar luj uut Ulf hebt laoten zetten. Die dachten dat ze de kabels zomaor ‘n endjen deur konnen trekken. (klik op de foto veur vegroting)
Gelukkeg het ’t allemaol goed gegaon. Eers maor ’s zien dat ze de luj bi-j de klaremieten griepen die haos ’n stel menselaeves op hun geweten hadden. Ze zuukt nog getugen en luj die d’r meer aover wetten, meugt ’n geheim 
nummer bellen. Umdat dat nummer geheim is, kan’k ow dat jammergenog niet vetellen, maor as d’r ni-js is, bunt jullie de eersten die ’t wetten.
Jan van Beernd en Mieneken
Umdat ‘t zo kold was, stingen d’r maor weineg mensen te kieken. Op de veurgrond ‘de Wierix-baek’, de belangriekste waterweg um Zillevold met de rest van de bewoonde wereld te vebinden. (klik op de foto veur vegroting)
