Janmac-blog
maandag 15 mei 2017
Op vakantie nuumt wi-j dat en mien vrouw en ik kekken d'r al 'n heel hötje noor uut. Veurig joor wazzen wi-j in 't eigeste hotel en ok dit keer hadden wi-j d'r geen spiet van. De andere Hollanders die d’r wazzen jammergenog ok niet, want 'n hoop luj hadden de eigenste advetensie gelaezen aover Clostermannshof op een of andere aanbiedingswebsite. Van die Hollanders hadden wi-j wieters gin las, want wi-j zaggen ze alleneg ’s marges bi-j ’t onbijt as ze weer völs te völ op ’t bod deien umdat ze nooit eerder zovöl aetgrei bi-j meka gezien hadden.
Nao 't ontbijt gaot wi-j meestal hen en slaopen nog ’n hötjen, want ontbijten mo’j al veur tien uur ’s marges, zowat in’t hols van de nach dus. Doornao maken wi-j altied ’n flinke fietstoch en door kommen wi-j dan de dag goed met deur.
Op zaoterdag stong Köllen op 't programma en dat was 'n ritje van zo'n viefenzestig kilometer hen en weerum.
't Was hatstikke mooi weer en wi-j reien 't grootste stuk naeven de Rien. Zönneke op de kop en lekker knaejen, weinig wind en maor kieken noor dat mooie Rienlandschap. In Köllen was 't allejekes druk. Allemaol butenlandes die net as wi-j effen kwammen kieken of den groten dom d'r nog stong. Viel met. Ok liepen der 'n hoop van die lapzwanzen de hele dag te zoepen. Buten, met 'n bierfles in de hand en schik dat ze hadden. Wi-j hemmen eiges 'n heel ander idee van schik maken.
Op de trugweg kwammen wi-j aover de Hohenzollernbrug en den hieng helemaol vol met hangslötjes.
Van teveuren ha'k 'n kötte wandeltoch deur de stad uutgezet op mien gps-jen, trouwes de hele rit ston door op. Hoeven i-j nörges de weg te vraogen. Ik had ok speciaal uutgezoch waor 't stanbeeld steet van de beruumste kaerls van Köllen: Tünnes und Schäl. En door wo'k met op de foto. Niet veur niks wazzen de avonturen van die beien 't eerste Duits da'k kon laezen. Mien vader brach altied buukskes met as e weer naor Duitsland was gewes, vaak met de avonturen derin van Tünnes und Schäl. Tünnes en de Schaele zeien wi-j. Vanaf 'n joor of tien he'k die möpkes al gelaezen en umda'k altied wetten wol hoe 't afliep, las ik vaneiges wieter, ok a'k 't niet helemaol snappen. Now liek Kölls 'n betjen op Achterhoeks en dat vilt dus vaneiges bes wel met. Örges het dat iets te maken met 't bisdom Münster woor wi'j heel vrogger, veur 1821 net as Köllen, op een of andere manier ok bi-jheurden.
Eers moor 's effekes 'n veurbeeldje van möpkes aover Tünes und Schäl:
Schäl im Himmel
“Du, Tünnes, ich han heut nacht jeträumt, ich wär im Himmel und werd em liewe Herrgott vorgestellt.”
Ich han en jefragt: “Sag, liewe Herrgott, wie lang is für dich ene Million Jahre?”
Da hat er sich de Bart gestriche un jesagt: “So lang wie e Minütche!”
“Un, liewe Herrgott, wieviel is dann für dich ene Million Mark?” – “So viel wie en Grosche!”
Da hat es mich gejuckt un ich han en jefragt: “Dann sei doch so jut un geb mir nur en janz kleine Grosche!”
“Un was hat er darauf jeantwortet?”
“Ich geh et holen. Wart e Minütche!”
Klo
Tünnes und Schäl machen Urlaub auf dem Lande. Da gibt es nur ein “Plumpsklo”.
Tünnes kommt mit eingefallenen Wangen endlich heraus. Schäl sagt entsetzt: “wie sühst du dann us, wat is loss?” - “leeven Schäl, ich kann nit mie, ich han mie Jebiss im Klo verlore” - “Jo, häs de dann nit versöök, do widder dran ze kumme?” - meint d’r Schäl: “Jo jo dat, ich han at drei Jebesse anprobiert, ävver keins hätt jepass.”
Nerz
Tünnes erzählt dem Schäl: “ich hann minger Frau zum Jebootdaach ne echte Nerz jeschenk.”
Meint der Schäl: “datt hätt ding Frau ävver och wirklich verdeent.”
Tünnes: “noh zwei Woche hann ich ihr dä Nerz ävver widder affjenomme.”
“Woröm datt dann? Wor e ze klein?”
“Datt nitt, ävver ming Frau hätt dä Käfich nit sauber jemaht!”
Langs de Rien
Met moederdag, of zegt ze tegeswoordeg Feyenoorddag, bunt wi-j lekker 'n weekendje weggewes. Naor Niederkassel of in ieder geval 'n plaetske door vlakbi-j. Lekker wied weg van dat genäöl aover Feyenoord, Ajax, en dat songfestival met die drie blote deerns die in ’n uur ’n hond dood zingen. Thuus zet ik op mien computer soms effen de tv an, opgeluch da'k door niet naor hoef te kieken.
Den met den dikken neus heit Tünnes en weurum den langen 'Schäl' heit, wödt helemaol dudelek a'j effen goed kiekt noor de foto rechs. Op de foto hieronder steet helemaol links Tünnes en den enen in 't midden heurt der ga niet bi-j, maor hi'j mos en zol d'r bi-jop.
De fotograaf prongeluk ok en dat kö’j zien a’j naor de vegroting van mien fietsespiegeltje hieronder kiek.
Op moederdag gongen wi-j noor Bonn. Dat was nog gin viefteg kilometer hen en weerum, maor wat 't weer anging, nammen wi-j 'n betjen 'n risico. Dus raegenjeskes achterin de fietstas en wi-j weer haevig biebels an de geng. Jao biebels, want Jezus zei tegen de Filipenzen: “kop aover 't stuur en dan moor sjenzen,” Jezus zei trouwes ok tegen tegen zien discipelen: “a'j gin fiets heb, mo'j moor tippelen.”
Weer lekker langs de Rien en onder 'n mooie blauwe loch. In Bonn is 't stukken gezelliger dan in Köllen. Lang niet zovöl volk en 'n stuk gemudeleker. Op 'n groot plein ston wel ‘n boel volk te luusteren noor zo'n politicus, maor door trokken wi-j ons niks van an. 't Wazzen vekiezingen in Nordrhein Westfalen. Gewoon deurlopen dus en veural niet noor die liegebeesten luusteren. Eers effen waezen kieken noor 't huus woor vrogger Beethoven gewoond het en toen 'n stuk of wat barokke kastelen bekekken. In Köllen hielen wi-j 't niet in de kop um in de binnestad te fietsen, maor in Bonn ko'j nog aardig uut de vuut met de fiets.
Van Bonn uut ging 't wiejer naor Bad Godesberg. Ok weer wat mooie landhuzen en kasteeltjes bekekken. A'w now de staatslotteri-j winnen, wetten wi-j teminste woor wi-j met dat geld hen können.
Op de trugweg weer langs de Rien en now gongen wi-j 'n tandjen hadder. Eers umdat wi'j de pont mossen halen en wat later umdat ons now toch ech 'n haevige raegenbuj baoven de kop hieng.
Toen wi-j de fiets bi-j 't hotel in de Fahrradgarage hadden geparkeerd, begon 't al 'n betjen te miegen en eenmaol op onze kamer heurden wi-j 'n allejekes mooi bujken noor onderen vallen. Eiges hielen wi-j de kont mooi dreug.
Betjen geluk mo'j hemmen. Niet dan.
